har shaKHs apne aap mein simTa hua mila

har shaḳhs apne aap meñ simTā huā milā

har ek sochtā hai mujhe kis se kyā milā

is shahr meñ guzārtā ik umr aur maiñ

vo to ye ḳhairiyat huī banda bhalā milā

yā to rahā huuñ ḳhud se hī mahv-e-kalām maiñ

yā phir mujhī sā koī mujhe dūsrā milā

aaise mirī sadā ne ta.āqub kiyā mirā

jaise maiñ ḳhud ko chhoḌ ke auroñ se jā milā

kuchh ajnabī se chehroñ ko kal dekhte hue

yādoñ meñ aisā kho sā gayā ḳhud se jā milā

māñgā jo ek bhiiḌ ne kal mujh se rāsta

dekhā to maiñ hī raah meñ bikhrā huā milā

kyuuñ 'talḳh' tujh ko kaisā lagā vaqt kā chalan

andar se koī ajnabī jab TūTtā milā

har shaKHs apne aap mein simTa hua mila

har ek sochta hai mujhe kis se kya mila

is shahr mein guzarta ek umr aur main

wo to ye KHairiyat hui banda bhala mila

ya to raha hun KHud se hi mahw-e-kalam main

ya phir mujhi sa koi mujhe dusra mila

aaise meri sada ne taaqub kiya mera

jaise main KHud ko chhoD ke auron se ja mila

kuchh ajnabi se chehron ko kal dekhte hue

yaadon mein aisa kho sa gaya KHud se ja mila

manga jo ek bhiD ne kal mujh se rasta

dekha to main hi rah mein bikhra hua mila

kyun 'talKH' tujh ko kaisa laga waqt ka chalan

andar se koi ajnabi jab TuTta mila