har shaKHs apne aap se uljha dikhai de
har shaḳhs apne aap se uljhā dikhā.ī de
ehsās kī chitā meñ sulagtā dikhā.ī de
is daur-e-irtiqā kā ye e'jāz kam nahīñ
har shaḳhs apne qad se nikaltā dikhā.ī de
qātil kī dastaras se bahut duur huuñ magar
ḳhanjar mire jigar meñ utartā dikhā.ī de
dhartī kī kokh bāñjh nahīñ maslahat hai ye
sabza to pattharoñ pe bhī ugtā dikhā.ī de
sūraj ko lālTain dikhātā hai aadmī
āñkhoñ ke bāvajūd bhī andhā dikhā.ī de
jiddat-pasandiyoñ kī milī hai mujhe sazā
har shaḳhs mere ḳhuun kā pyāsā dikhā.ī de
'sābir' junūn-e-ārzū hai vo balā jise
apnā dikhā.ī de na parāyā dikhā.ī de
har shaKHs apne aap se uljha dikhai de
ehsas ki chita mein sulagta dikhai de
is daur-e-irtiqa ka ye e'jaz kam nahin
har shaKHs apne qad se nikalta dikhai de
qatil ki dastaras se bahut dur hun magar
KHanjar mere jigar mein utarta dikhai de
dharti ki kokh banjh nahin maslahat hai ye
sabza to pattharon pe bhi ugta dikhai de
suraj ko lalTain dikhata hai aadmi
aankhon ke bawajud bhi andha dikhai de
jiddat-pasandiyon ki mili hai mujhe saza
har shaKHs mere KHun ka pyasa dikhai de
'sabir' junun-e-arzu hai wo bala jise
apna dikhai de na paraya dikhai de
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
