har shaKHs yahan mujhko bimar sa lagta hai

har shaḳhs yahāñ mujh ko bīmār sā lagtā hai

is shahr meñ ab jiinā āzār sā lagtā hai

sochoñ kī dukāneñ haiñ yādoñ ke khilaune haiñ

siine meñ mire koī bāzār sā lagtā hai

dekhā tumheñ jab se ehsās ke āñgan meñ

har jazba-e-ḳhvābīda bedār sā lagtā hai

ab rāh-e-mohabbat meñ chalnā hai bahut mushkil

is raah kā har patthar kohsār sā lagtā hai

maanā ki tire lab par alfāz to achchhe haiñ

lekin ye tirā lahja talvār sā lagtā hai

kuchh shahr ke dukhḌe haiñ kuchh ghar ke masā.il haiñ

mujh ko ye tirā ḳhat bhī aḳhbār sā lagtā hai

hālāt ne bhar dī hai talḳhī sī tabī.at meñ

ab kār-e-suḳhan-sāzī dushvār sā lagtā hai

dar-asl vo kaisā hai ye ba.ad kī bāteñ haiñ

chehre se magar 'shāhid' ġham-ḳhvār sā lagtā hai

har shaKHs yahan mujh ko bimar sa lagta hai

is shahr mein ab jina aazar sa lagta hai

sochon ki dukanen hain yaadon ke khilaune hain

sine mein mere koi bazar sa lagta hai

dekha tumhein jab se ehsas ke aangan mein

har jazba-e-KHwabida bedar sa lagta hai

ab rah-e-mohabbat mein chalna hai bahut mushkil

is rah ka har patthar kohsar sa lagta hai

mana ki tere lab par alfaz to achchhe hain

lekin ye tera lahja talwar sa lagta hai

kuchh shahr ke dukhDe hain kuchh ghar ke masail hain

mujh ko ye tera KHat bhi aKHbar sa lagta hai

haalat ne bhar di hai talKHi si tabiat mein

ab kar-e-suKHan-sazi dushwar sa lagta hai

dar-asl wo kaisa hai ye baad ki baaten hain

chehre se magar 'shahid' gham-KHwar sa lagta hai