har subh-e-daraKHshan mere liye paigham-e-masarrat hoti hai

har sub.h-e-daraḳhshāñ mere liye paiġhām-e-masarrat hotī hai

ya.anī ik din kam aur huā ab maut se qurbat hotī hai

duniyā ke muñh se suntā huuñ aur sun kar sochtā rahtā huuñ

jo niiñd se ik dam jaag uThe aisī bhī qismat hotī hai

hastī kī karvaT paik-e-ajal aur paik-e-ajal paiġhām-e-sukūñ

hastī jab karvaT letī hai ālām se fursat hotī hai

mañjdhār se kashtī bach niklī to sāhil se majrūh huī

mallāh pe ab ye bhed khulā qismat phir qismat hotī hai

allāh re sola saal kā sin raftār na.ī guftār na.ī

is umr kī kyā tārīf karūñ ye umr qayāmat hotī hai

nazroñ se nazreñ milte hī sharmānā jhijaknā jhuñjhlānā

o nāz-o-adā vaale yuuñ bhī tā.īd-e-mohabbat hotī hai

har roz kahāñ gāhe-gāhe aur vo bhī bas ik do jur.e

maiñ bhī pī letā huuñ 'bismil' jab us kī rahmat hotī hai

har subh-e-daraKHshan mere liye paigham-e-masarrat hoti hai

yani ek din kam aur hua ab maut se qurbat hoti hai

duniya ke munh se sunta hun aur sun kar sochta rahta hun

jo nind se ek dam jag uThe aisi bhi qismat hoti hai

hasti ki karwaT paik-e-ajal aur paik-e-ajal paigham-e-sukun

hasti jab karwaT leti hai aalam se fursat hoti hai

manjdhaar se kashti bach nikli to sahil se majruh hui

mallah pe ab ye bhed khula qismat phir qismat hoti hai

allah re sola sal ka sin raftar nai guftar nai

is umr ki kya tarif karun ye umr qayamat hoti hai

nazron se nazren milte hi sharmana jhijakna jhunjhlana

o naz-o-ada wale yun bhi taid-e-mohabbat hoti hai

har roz kahan gahe-gahe aur wo bhi bas ek do jure

main bhi pi leta hun 'bismil' jab us ki rahmat hoti hai