har tar-e-nafas Khaar hai malum nahin kyun

har tār-e-nafas ḳhaar hai ma.alūm nahīñ kyuuñ

āsān bhī dushvār hai ma.alūm nahīñ kyuuñ

sau baar marūñ aur jiyūñ tab unheñ pā.ūñ

dil is pe bhī tayyār hai ma.alūm nahīñ kyuuñ

sau tarah ke ārām mayassar sahī lekin

dil jiine se bezār hai ma.alūm nahīñ kyuuñ

jo lazzatī-e-jaur-o-jafā thā usī dil par

ik shoḳh-nazar baar hai ma.alūm nahīñ kyuuñ

ik baar milī un se nazar pī nahīñ koī

phir bahkī sī raftār hai ma.alūm nahīñ kyuuñ

sau jaan se ham jis pe fidā hote haiñ din-rāt

vo darpai-e-āzār hai ma.alūm nahīñ kyuuñ

'jāmī' vo muḳhātab haiñ magar arz-e-tamannā

phir bhī mujhe dushvār hai ma.alūm nahīñ kyuuñ

har tar-e-nafas KHar hai malum nahin kyun

aasan bhi dushwar hai malum nahin kyun

sau bar marun aur jiyun tab unhen paun

dil is pe bhi tayyar hai malum nahin kyun

sau tarah ke aaram mayassar sahi lekin

dil jine se bezar hai malum nahin kyun

jo lazzati-e-jaur-o-jafa tha usi dil par

ek shoKH-nazar bar hai malum nahin kyun

ek bar mili un se nazar pi nahin koi

phir bahki si raftar hai malum nahin kyun

sau jaan se hum jis pe fida hote hain din-raat

wo darpai-e-azar hai malum nahin kyun

'jami' wo muKHatab hain magar arz-e-tamanna

phir bhi mujhe dushwar hai malum nahin kyun