har taraf mauj-e-bala ki si rawani dekhi

har taraf mauj-e-balā kī sī ravānī dekhī

ashk kī god meñ majbūr kahānī dekhī

ham badalte hī rahe ishq meñ mausam ke magar

ghar kī chaukhaT pe sadā gard purānī dekhī

dard ke sahn ko dushman nahīñ jaanā ham ne

is meñ dilkash na.ī duniyā kī nishānī dekhī

dasht-e-vahshat kī numā.ish kā havāla de kar

shahr-e-dildār ke tevar kī javānī dekhī

chāñd tāroñ ke tale haath meñ ḳhanjar thāme

muskurātī sī kahīñ ek divānī dekhī

ek āvāz na.ī kaan meñ gūñjī us dam

jab bhī tasvīr zamāne kī suhānī dekhī

ḳhush-libāsī pe havāoñ kī na jaanā 'ja.afar'

us ke halqe meñ pareshān sī raanī dekhī

har taraf mauj-e-bala ki si rawani dekhi

ashk ki god mein majbur kahani dekhi

hum badalte hi rahe ishq mein mausam ke magar

ghar ki chaukhaT pe sada gard purani dekhi

dard ke sahn ko dushman nahin jaana hum ne

is mein dilkash nai duniya ki nishani dekhi

dasht-e-wahshat ki numaish ka hawala de kar

shahr-e-dildar ke tewar ki jawani dekhi

chand taron ke tale hath mein KHanjar thame

muskuraati si kahin ek diwani dekhi

ek aawaz nai kan mein gunji us dam

jab bhi taswir zamane ki suhani dekhi

KHush-libasi pe hawaon ki na jaana 'jafar'

us ke halqe mein pareshan si rani dekhi