har taraf soz ka andaz judagana hai

har taraf soz kā andāz judāgāna hai

mutma.in sham.a hai yā raqs meñ parvāna hai

bartar-az-vahm-o-tasavvur mirā mai-ḳhāna hai

zindagī kyā hai mirī laġhzish-e-mastāna hai

vo jo ik shauq-e-junūñ-sāz kā afsāna hai

aañkh shāyad kahe dil to abhī dīvāna hai

hosh aayā na kabhī maiñ ne junūñ ko samjhā

dāvar-e-hashr yahīñ tak mirā afsāna hai

ab nigah un kī nigāhoñ se mile yā na mile

ḳhud hī pahuñchegā jo taqdīr kā paimāna hai

aap sun leñ to kuchh aa jaa.e asar bhī shāyad

yuuñ to har tarah mukammal mirā afsāna hai

husn ik phuul sahī nāzuk-o-rangīñ lekin

ishq se duur hai jab tak gul-e-vīrāna hai

kasrat-e-fahm ne itnā bhī samajhne na diyā

maiñ huuñ afsāna ki duniyā mirā afsāna hai

ai ḳhushā tāla-e-bedār-e-mohabbat 'bāsit'

aaj un kī bhī nazar meñ mirā afsāna hai

har taraf soz ka andaz judagana hai

mutmain shama hai ya raqs mein parwana hai

bartar-az-wahm-o-tasawwur mera mai-KHana hai

zindagi kya hai meri laghzish-e-mastana hai

wo jo ek shauq-e-junun-saz ka afsana hai

aankh shayad kahe dil to abhi diwana hai

hosh aaya na kabhi main ne junun ko samjha

dawar-e-hashr yahin tak mera afsana hai

ab nigah un ki nigahon se mile ya na mile

KHud hi pahunchega jo taqdir ka paimana hai

aap sun len to kuchh aa jae asar bhi shayad

yun to har tarah mukammal mera afsana hai

husn ek phul sahi nazuk-o-rangin lekin

ishq se dur hai jab tak gul-e-virana hai

kasrat-e-fahm ne itna bhi samajhne na diya

main hun afsana ki duniya mera afsana hai

ai KHusha tala-e-bedar-e-mohabbat 'basit'

aaj un ki bhi nazar mein mera afsana hai