har taraf udasi hai hausle bhi zaKHmi hain

har taraf udāsī hai hausle bhī zaḳhmī haiñ

dil-lagī ke mausam meñ qahqahe bhī zaḳhmī haiñ

vahshatoñ ke pairoñ meñ kaun bāñdhe zanjīreñ

kyā kareñ kahāñ jaa.eñ faisle bhī zaḳhmī haiñ

be-hayā.ī ke saa.e ġhālib aa ga.e ham par

āj-kal tamaddun ke zāviye bhī zaḳhmī haiñ

rāh-o-rasm kā qaa.il ab nahīñ rahā insāñ

haiñ lahū lahū rishte rābte bhī zaḳhmī haiñ

kīmiyā.ī fasloñ ke baa.is ab ġhizāoñ se

gum huī ġhizā.iyyat zā.iqe bhī zaḳhmī haiñ

ab kahāñ nikalte haiñ hāsil-e-ġhazal ash.ār

chīḳhtī radīfeñ haiñ qāfiye bhī zaḳhmī haiñ

be-ġharaz nahīñ jaatā ab koī ayādat ko

ab to ġham-gusārī ke mashġhale bhī zaḳhmī haiñ

al-ġharaz pahuñchnā hai āgahī kī manzil par

hasrateñ haiñ pazhmurda rāste bhī zaḳhmī haiñ

'shād' kis tarah apnā ilm bāñTeñ auroñ ko

nutq-o-lab muqaffal haiñ falsafe bhī zaḳhmī haiñ

har taraf udasi hai hausle bhi zaKHmi hain

dil-lagi ke mausam mein qahqahe bhi zaKHmi hain

wahshaton ke pairon mein kaun bandhe zanjiren

kya karen kahan jaen faisle bhi zaKHmi hain

be-hayai ke sae ghaalib aa gae hum par

aaj-kal tamaddun ke zawiye bhi zaKHmi hain

rah-o-rasm ka qail ab nahin raha insan

hain lahu lahu rishte rabte bhi zaKHmi hain

kimiyai faslon ke bais ab ghizaon se

gum hui ghizaiyyat zaiqe bhi zaKHmi hain

ab kahan nikalte hain hasil-e-ghazal ashaar

chiKHti radifen hain qafiye bhi zaKHmi hain

be-gharaz nahin jata ab koi ayaadat ko

ab to gham-gusari ke mashghale bhi zaKHmi hain

al-gharaz pahunchna hai aagahi ki manzil par

hasraten hain pazhmurda raste bhi zaKHmi hain

'shad' kis tarah apna ilm banTen auron ko

nutq-o-lab muqaffal hain falsafe bhi zaKHmi hain