har tasalli rahi nakaam to phir kya hoga

har tasallī rahī nākām to phir kyā hogā

bujh gayā dil hī sar-e-shām to phir kyā hogā

har qadam dār-o-rasan manzil-e-jānāñ hai ab

ishq kā ho yahī anjām to phir kyā hogā

morid-e-jurm Thaharte haiñ faqat ahl-e-junūñ

yūñhī hote rahe badnām to phir kyā hogā

safar-e-manzil-e-jānāñ to hai paiġhām-e-ajal

shauq kā ho yahī in.aam to phir kyā hogā

jis ke aage nahīñ parvā-e-matā-e-dil-o-jāñ

ahl-e-dil paa.eñ vo paiġhām to phir kyā hogā

jis pe ḳhud ko haiñ luTā baiThe 'zubair' ahl-e-talab

vahī dāvat jo huī aam to phir kyā hogā

har tasalli rahi nakaam to phir kya hoga

bujh gaya dil hi sar-e-sham to phir kya hoga

har qadam dar-o-rasan manzil-e-jaanan hai ab

ishq ka ho yahi anjam to phir kya hoga

morid-e-jurm Thaharte hain faqat ahl-e-junun

yunhi hote rahe badnam to phir kya hoga

safar-e-manzil-e-jaanan to hai paigham-e-ajal

shauq ka ho yahi inam to phir kya hoga

jis ke aage nahin parwa-e-mata-e-dil-o-jaan

ahl-e-dil paen wo paigham to phir kya hoga

jis pe KHud ko hain luTa baiThe 'zubair' ahl-e-talab

wahi dawat jo hui aam to phir kya hoga