har waqt ye dil aap ki taswir nihaare

har vaqt ye dil aap kī tasvīr nihāre

bechāra akelā hai bhalā kis ko pukāre

kyoñ aañkh se bah jaa.e na ashkoñ kā samundar

ik 'umr basar karnī hai yādoñ ke sahāre

kyā bhuul ga.e ham meñ ye duniyā bhī baTī thī

sab aap ke hisse meñ thā aur aap hamāre

āñkheñ jo tire naam thiiñ ab bhī vo tirī haiñ

aañsū ke ka.ī qatre abhī tak haiñ kuñvāre

vo maiñ hī thā pāgal ki tirī chaah meñ gum thā

hālāñki kiye vaqt ne har-chand ishāre

yak-laḳht jo ujḌā hai to dobāra na dekhā

mā'sūm se sapne ko koī yuuñ to na maare

ḳhushbū na koī rang na kaliyoñ kā tabassum

is dā.imī patjhaḌ ko koī kaise guzāre

'nāsir' zarā nīñdoñ se bhī aTkheliyāñ kar le

ye chāñd bhī ab duub gayā bujh ga.e taare

har waqt ye dil aap ki taswir nihaare

bechaara akela hai bhala kis ko pukare

kyon aankh se bah jae na ashkon ka samundar

ek 'umr basar karni hai yaadon ke sahaare

kya bhul gae hum mein ye duniya bhi baTi thi

sab aap ke hisse mein tha aur aap hamare

aankhen jo tere nam thin ab bhi wo teri hain

aansu ke kai qatre abhi tak hain kunware

wo main hi tha pagal ki teri chah mein gum tha

haalanki kiye waqt ne har-chand ishaare

yak-laKHt jo ujDa hai to dobara na dekha

ma'sum se sapne ko koi yun to na mare

KHushbu na koi rang na kaliyon ka tabassum

is daimi patjhaD ko koi kaise guzare

'nasir' zara nindon se bhi aTkheliyan kar le

ye chand bhi ab dub gaya bujh gae tare