har zarra chashm-e-shauq-e-sar-e-rahguzar hai aaj

har zarra chashm-e-shauq-e-sar-e-rahguzar hai aaj

dil mahv-e-intizār hai aur kis qadar hai aaj

goyā vo jalva-gar haiñ nigāhoñ ke rū-ba-rū

is darja e.atibār-e-fareb-e-nazar hai aaj

mad-hoshī-e-jamāl hai yā husn-e-iltifāt

tamkīñ se be-ḳhabar nigah-e-fitnagar hai aaj

aahaT pe saañs kī tirī aamad kā hai gumāñ

hañgāma-e-hayāt bhī ḳhāmosh-tar hai aaj

jo rāz-e-do-jahāñ hai amānat hai husn kī

hāsil mujhe vo azmat-e-dard-e-jigar hai aaj

manzil kā mujh ko hosh na apnī ḳhabar hai aaj

vo jān-e-ārzū jo mirā ham-safar hai aaj

tahlīl ho na jaa.e kahīñ rūh-e-kā.enāt

saaqī jo ye latāfat-e-kaif-e-nazar hai aaj

mahviyyat-e-jamāl meñ yārā-e-guftugū

ai arz-e-shauq ālam-e-nau-e-digar hai aaj

sāz-e-alam bhī soz-e-tarab-ḳhez hai 'hamīd'

har ik navā-e-dard mirī naġhma-gar hai aaj

har zarra chashm-e-shauq-e-sar-e-rahguzar hai aaj

dil mahw-e-intizar hai aur kis qadar hai aaj

goya wo jalwa-gar hain nigahon ke ru-ba-ru

is darja eatibar-e-fareb-e-nazar hai aaj

mad-hoshi-e-jamal hai ya husn-e-iltifat

tamkin se be-KHabar nigah-e-fitnagar hai aaj

aahaT pe sans ki teri aamad ka hai guman

hangama-e-hayat bhi KHamosh-tar hai aaj

jo raaz-e-do-jahan hai amanat hai husn ki

hasil mujhe wo azmat-e-dard-e-jigar hai aaj

manzil ka mujh ko hosh na apni KHabar hai aaj

wo jaan-e-arzu jo mera ham-safar hai aaj

tahlil ho na jae kahin ruh-e-kaenat

saqi jo ye latafat-e-kaif-e-nazar hai aaj

mahwiyyat-e-jamal mein yara-e-guftugu

ai arz-e-shauq aalam-e-nau-e-digar hai aaj

saz-e-alam bhi soz-e-tarab-KHez hai 'hamid'

har ek nawa-e-dard meri naghma-gar hai aaj