hara-bhara tha chaman mein shajar akela tha

harā-bharā thā chaman meñ shajar akelā thā

shajar pe barg bahut the samar akelā thā

baqā-e-nūr falak par bhī ho ga.ī mushkil

umaD rahī thiiñ ghaTā.eñ qamar akelā thā

yahī to ek tamāsha pas-e-tamāshā thā

tamāsh-bīñ the bahut dīda-var akelā thā

rafāqatoñ se ye tanhā.ī kam nahīñ hotī

sharīk-e-bazm to thā maiñ magar akelā thā

gunāh-e-ishq kī kaisī sazā milī ham ko

ki sañg-bār ziyāda the sar akelā thā

kiyā thā ham ne safar saath saath yuuñ 'ālam'

ki maiñ akelā mirā ham-safar akelā thā

hara-bhara tha chaman mein shajar akela tha

shajar pe barg bahut the samar akela tha

baqa-e-nur falak par bhi ho gai mushkil

umaD rahi thin ghaTaen qamar akela tha

yahi to ek tamasha pas-e-tamasha tha

tamash-bin the bahut dida-war akela tha

rafaqaton se ye tanhai kam nahin hoti

sharik-e-bazm to tha main magar akela tha

gunah-e-ishq ki kaisi saza mili hum ko

ki sang-bar ziyaada the sar akela tha

kiya tha hum ne safar sath sath yun 'alam'

ki main akela mera ham-safar akela tha