hare hue nahin atraf ke shajar mere

hare hue nahīñ atrāf ke shajar mere

mujhe to yuuñ bhī izāfī haiñ bāl-o-par mere

bhaTakne vaale bhī ik roz ghar pahuñchte haiñ

batā rahā thā koī haath dekh kar mere

kuchh is liye bhī mujhe rāsta durust lagā

chale nahīñ the mire saath ham-safar mere

bichhaḌne par mirī poroñ se ḳhuun risne lagā

qarīb rahne lagā thā vo is qadar mere

maiñ apnī khoj meñ niklā thā raftagāñ kī taraf

bikhar ga.e haiñ zamāne idhar udhar mere

faroḳht hone pe āmāda ho gayā āḳhir

mujhe charāġh na kahte the kūza-gar mere

hare hue nahin atraf ke shajar mere

mujhe to yun bhi izafi hain baal-o-par mere

bhaTakne wale bhi ek roz ghar pahunchte hain

bata raha tha koi hath dekh kar mere

kuchh is liye bhi mujhe rasta durust laga

chale nahin the mere sath ham-safar mere

bichhaDne par meri poron se KHun risne laga

qarib rahne laga tha wo is qadar mere

main apni khoj mein nikla tha raftagan ki taraf

bikhar gae hain zamane idhar udhar mere

faroKHt hone pe aamada ho gaya aaKHir

mujhe charagh na kahte the kuza-gar mere