harf aur saut ke mabain raha karti hai

harf aur saut ke mābain rahā kartī hai

vo ḳhamoshī jo bahut shor bapā kartī hai

vo nazar mujh ko sivā aur sivā kartī hai

laġhzishoñ par jo mirī tanz kiyā kartī hai

jis kī tā'mīr meñ lag jaatī haiñ īñTeñ TeḌhī

ghar kī aksar vahī dīvār girā kartī hai

jis kī nisbat se hai pahchān salāmat merī

un pe taqdīr mirī naaz kiyā kartī hai

soch meñ apnī use qaid kiyā karte ho

soch se pahle jo maujūd rahā kartī hai

jis kī qismat meñ nahīñ ġham vahī sā'at aksar

zabt-e-ġham kī mujhe talqīn kiyā kartī hai

kitne chehroñ se masarrat ke ulaTtī hai naqāb

vo udāsī jo mire ghar meñ rahā kartī hai

jalte bujhte hue lamhoñ ke badan kī chādar

mere iz.hār ko vijdān 'atā kartī hai

shām-e-ġham toḌ diyā kartī hai jis ko aksar

sub.h-e-ummīd vahī ḳhvāb bunā kartī hai

ye ishārat ye 'ibārat ye 'alāmat 'vasfī'

lafz ko 'aam ma'ānī se judā kartī hai

harf aur saut ke mabain raha karti hai

wo KHamoshi jo bahut shor bapa karti hai

wo nazar mujh ko siwa aur siwa karti hai

laghzishon par jo meri tanz kiya karti hai

jis ki ta'mir mein lag jati hain inTen TeDhi

ghar ki aksar wahi diwar gira karti hai

jis ki nisbat se hai pahchan salamat meri

un pe taqdir meri naz kiya karti hai

soch mein apni use qaid kiya karte ho

soch se pahle jo maujud raha karti hai

jis ki qismat mein nahin gham wahi sa'at aksar

zabt-e-gham ki mujhe talqin kiya karti hai

kitne chehron se masarrat ke ulaTti hai naqab

wo udasi jo mere ghar mein raha karti hai

jalte bujhte hue lamhon ke badan ki chadar

mere izhaar ko wijdan 'ata karti hai

sham-e-gham toD diya karti hai jis ko aksar

subh-e-ummid wahi KHwab buna karti hai

ye ishaarat ye 'ibarat ye 'alamat 'wasfi'

lafz ko 'am ma'ani se juda karti hai