harf-e-ghazal se rang-e-tamanna bhi chhin le

harf-e-ġhazal se rañg-e-tamannā bhī chhīn le

maiñ jal rahā huuñ ātish-e-naġhma bhī chhīn le

be-barg-o-bār ho gayā imroz kā shajar

mujh se matā-e-gulshan-e-fardā bhī chhīn le

mere junūñ ko hājat-e-dīvār-o-dar nahīñ

ghar se judā huā huuñ to saaya bhī chhīn le

ab to nashāt-e-dīd kā bhī silsila gayā

ya.anī dil-o-nigāh kā rishta bhī chhīn le

chhīnā hai tū ne shaam ke ruḳh se salonā-pan

ab shahr-e-ārzū se ujālā bhī chhīn le

baaqī rahe na dast-e-tasarruf meñ koī shai

jo kuchh mujhe diyā thā vo hissa bhī chhīn le

harf-e-ghazal se rang-e-tamanna bhi chhin le

main jal raha hun aatish-e-naghma bhi chhin le

be-barg-o-bar ho gaya imroz ka shajar

mujh se mata-e-gulshan-e-farda bhi chhin le

mere junun ko hajat-e-diwar-o-dar nahin

ghar se juda hua hun to saya bhi chhin le

ab to nashat-e-did ka bhi silsila gaya

yani dil-o-nigah ka rishta bhi chhin le

chhina hai tu ne sham ke ruKH se salona-pan

ab shahr-e-arzu se ujala bhi chhin le

baqi rahe na dast-e-tasarruf mein koi shai

jo kuchh mujhe diya tha wo hissa bhi chhin le