harf-e-tadbir na tha harf-e-dilasa raushan

harf-e-tadbīr na thā harf-e-dilāsa raushan

maiñ jo Duubā to huā sāhil-e-dariyā raushan

ahd meñ apne musallat hai añdheroñ kā azaab

taaq meñ vaqt ke rakh do koī lamha raushan

yūsuf-āsā sar-e-bāzār haiñ rusvā lekin

vādī-e-ishq meñ hai azm-e-zuleḳhā raushan

jo mirī maañ ne diyā raḳht-e-safar kī sūrat

mere māthe pe abhī tak hai vo bosa raushan

tiir añdheroñ ke mujhe zad meñ liye baiThe haiñ

jaise is bazm meñ huuñ maiñ hī akelā raushan

ain mumkin hai pighal jaa.eñ añdhere dil ke

ai 'zafar' aise meñ ho gar koī naġhma raushan

harf-e-tadbir na tha harf-e-dilasa raushan

main jo Duba to hua sahil-e-dariya raushan

ahd mein apne musallat hai andheron ka azab

taq mein waqt ke rakh do koi lamha raushan

yusuf-asa sar-e-bazar hain ruswa lekin

wadi-e-ishq mein hai azm-e-zuleKHa raushan

jo meri man ne diya raKHt-e-safar ki surat

mere mathe pe abhi tak hai wo bosa raushan

tir andheron ke mujhe zad mein liye baiThe hain

jaise is bazm mein hun main hi akela raushan

ain mumkin hai pighal jaen andhere dil ke

ai 'zafar' aise mein ho gar koi naghma raushan