harf hun apne maani DhunDhta hun

harf huuñ apne ma.ānī DhūñDhtā huuñ

meñ haqīqat meñ kahānī DhūñDhtā huuñ

tang aa kar tangī-e-kaun-o-makāñ se

apne andar be-karānī DhūñDhtā huuñ

chhāntā huuñ ḳhaak sahrā-e-adam meñ

apne hone kī nishānī DhūñDhtā huuñ

merī har jānib na.e chehre saje haiñ

ab koī sūrat purānī DhūñDhtā huuñ

māñgtā huuñ tarz-e-nau rasm-e-kuhan se

ḳhushk dariyā meñ ravānī DhūñDhtā huuñ

aarzū ke biich muTThī meñ dabā.e

ziist ke sahrā meñ paanī DhūñDhtā huuñ

harf kī hiddat se lab jalne lage haiñ

ab zabān-e-be-zabānī DhūñDhtā huuñ

jo sikhā de āshtī ahl-e-zamīñ ko

vo kitāb-e-āsmānī DhūñDhtā huuñ

harf hun apne maani DhunDhta hun

mein haqiqat mein kahani DhunDhta hun

tang aa kar tangi-e-kaun-o-makan se

apne andar be-karani DhunDhta hun

chhanta hun KHak sahra-e-adam mein

apne hone ki nishani DhunDhta hun

meri har jaanib nae chehre saje hain

ab koi surat purani DhunDhta hun

mangta hun tarz-e-nau rasm-e-kuhan se

KHushk dariya mein rawani DhunDhta hun

aarzu ke bich muTThi mein dabae

zist ke sahra mein pani DhunDhta hun

harf ki hiddat se lab jalne lage hain

ab zaban-e-be-zabani DhunDhta hun

jo sikha de aashti ahl-e-zamin ko

wo kitab-e-asmani DhunDhta hun