harf ke phul chun ke late the

harf ke phuul chun ke laate the

roz taaza ġhazal sunāte the

dard kī sūratoñ meñ ik ghar thā

us kī vīrāniyāñ sajāte the

zindagī diary meñ likhte the

aur phir diary jalāte the

ik shajar thā jo us ke jaisā thā

us ko ham hāl-e-dil sunāte the

ab añdhere meñ baiThe rahte haiñ

pahle aksar diye jalāte the

us ke lahje kī zad meñ aate hī

kāñch ke ḳhvāb TuuT jaate the

zindagī kī galī meñ bhī kuchh log

maut kā giit gungunāte the

apne ġham se kashīd kar ke hañsī

ḳhud hī apnā fareb khāte the

be-niyāzī bhī ek ne.amat thī

yaad karte hī bhuul jaate the

āñsuoñ meñ bhigo ke rakhte the

phuul to phir bhī suukh jaate the

zindagī se kabhī milī ho 'sahar'

kuchh bulāve to tum ko aate the

harf ke phul chun ke late the

roz taza ghazal sunate the

dard ki suraton mein ek ghar tha

us ki viraniyan sajate the

zindagi diary mein likhte the

aur phir diary jalate the

ek shajar tha jo us ke jaisa tha

us ko hum haal-e-dil sunate the

ab andhere mein baiThe rahte hain

pahle aksar diye jalate the

us ke lahje ki zad mein aate hi

kanch ke KHwab TuT jate the

zindagi ki gali mein bhi kuchh log

maut ka git gungunate the

apne gham se kashid kar ke hansi

KHud hi apna fareb khate the

be-niyazi bhi ek neamat thi

yaad karte hi bhul jate the

aansuon mein bhigo ke rakhte the

phul to phir bhi sukh jate the

zindagi se kabhi mili ho 'sahar'

kuchh bulawe to tum ko aate the