harf larzan hain ki honTon pe wo aaen kaise?

harf larzāñ haiñ ki hoñToñ pe vo aa.eñ kaise?

raah meñ aahoñ ke sho.ale haiñ bujhā.eñ kaise?

vaz.a-dārī ke vo pahre haiñ ki ai jazba-e-dil

sañg aur aa.ina ik saath uThā.eñ kaise?

vo manāzir jo tabī.at ko javāñ rakhte haiñ

ai ḳhizāñ ab tire hāthoñ se bachā.eñ kaise?

ḳhushk āñkhoñ meñ utarne se bhalā kyā hogā

dil hai sad-pāra bhalā is meñ biThā.eñ kaise?

Dar hai dāman na sulag jaa.e Tapak jaa.e agar

ashk āñkhoñ meñ taḌapte haiñ bahā.eñ kaise?

ai 'atīq' aap kī ye kam-nazarī hai varna

is qadar jalve haiñ āñkhoñ meñ sajā.eñ kaise?

harf larzan hain ki honTon pe wo aaen kaise?

rah mein aahon ke shoale hain bujhaen kaise?

waza-dari ke wo pahre hain ki ai jazba-e-dil

sang aur aaina ek sath uThaen kaise?

wo manazir jo tabiat ko jawan rakhte hain

ai KHizan ab tere hathon se bachaen kaise?

KHushk aankhon mein utarne se bhala kya hoga

dil hai sad-para bhala is mein biThaen kaise?

Dar hai daman na sulag jae Tapak jae agar

ashk aankhon mein taDapte hain bahaen kaise?

ai 'atiq' aap ki ye kam-nazari hai warna

is qadar jalwe hain aankhon mein sajaen kaise?