harim-e-dard mein hun karb ke hisar mein hun

harīm-e-dard meñ huuñ karb ke hisār meñ huuñ

maiñ kis umiid pe huuñ kis ke intizār meñ huuñ

milegī ek na ik din vafā kī manzil bhī

maiñ ban ke dhuul mohabbat kī rahguzār meñ huuñ

patā bhī hai mirī baarī kabhī na aa.egī

maiñ nazm-o-zabt kā pāband huuñ qatār meñ huuñ

maiñ aa rahā huuñ tirī samt kitne barsoñ se

tirī kashish meñ huuñ kab apne iḳhtiyār meñ huuñ

galī galī meñ khile haiñ mahāz nafrat ke

maiñ shahr meñ huuñ ki maidān-e-kār-zār meñ huuñ

zamāna mujh ko kabhī bhī girā nahīñ saktā

yaqīn hai mujhe jab tak nigāh-e-yār meñ huuñ

mujhe nikāl le 'hasanī' sazā milī hai bahut

maiñ ab bhī qaid-e-anā ke muhīb ġhaar meñ huuñ

harim-e-dard mein hun karb ke hisar mein hun

main kis umid pe hun kis ke intizar mein hun

milegi ek na ek din wafa ki manzil bhi

main ban ke dhul mohabbat ki rahguzar mein hun

pata bhi hai meri bari kabhi na aaegi

main nazm-o-zabt ka paband hun qatar mein hun

main aa raha hun teri samt kitne barson se

teri kashish mein hun kab apne iKHtiyar mein hun

gali gali mein khile hain mahaz nafrat ke

main shahr mein hun ki maidan-e-kar-zar mein hun

zamana mujh ko kabhi bhi gira nahin sakta

yaqin hai mujhe jab tak nigah-e-yar mein hun

mujhe nikal le 'hasani' saza mili hai bahut

main ab bhi qaid-e-ana ke muhib ghaar mein hun