harim-e-jabr mein KHamosh bhi raha na gaya

harīm-e-jabr meñ ḳhāmosh bhī rahā na gayā

safīr-e-shab ko naqīb-e-sahar kahā na gayā

ajiib kaifiyat-e-karb hai fazāoñ meñ

guloñ ne bārhā chāhā magar hañsā na gayā

shab-e-sitam kā bayāñ jurm hī sahī kiije

gumāñ na ho ki sar-e-bazm kuchh kahā na gayā

ḳhayāl-e-ḳhātir-e-sāqī kī ḳhair rindoñ meñ

kahīñ bhī tazkira-e-tishnagī sunā na gayā

dayār-e-ishq hai goyā dayār-e-karb-o-balā

yahāñ se uTh ke koī dard-āshnā na gayā

ajab tarah ke musāfir the ham ki baiTh rahe

bhaTak ke raah se do gaam bhī chalā na gayā

hazār marhala-e-jabr se hue do-chār

dil-e-'shamīm' se jiine kā hausla na gayā

harim-e-jabr mein KHamosh bhi raha na gaya

safir-e-shab ko naqib-e-sahar kaha na gaya

ajib kaifiyat-e-karb hai fazaon mein

gulon ne barha chaha magar hansa na gaya

shab-e-sitam ka bayan jurm hi sahi kije

guman na ho ki sar-e-bazm kuchh kaha na gaya

KHayal-e-KHatir-e-saqi ki KHair rindon mein

kahin bhi tazkira-e-tishnagi suna na gaya

dayar-e-ishq hai goya dayar-e-karb-o-bala

yahan se uTh ke koi dard-ashna na gaya

ajab tarah ke musafir the hum ki baiTh rahe

bhaTak ke rah se do gam bhi chala na gaya

hazar marhala-e-jabr se hue do-chaar

dil-e-'shamim' se jine ka hausla na gaya