haris-e-KHwahish-e-lal-o-guhar nahin hui main

harīs-e-ḳhvāhish-e-la.al-o-guhar nahīñ huī maiñ

mohabbatoñ meñ talabgār-e-zar nahīñ huī maiñ

tirā ḳhayāl rahā dil kī dhaḌkanoñ ke qarīñ

so tere ġham se kabhī be-ḳhabar nahīñ huī maiñ

sajāyā ḳhud ko vafā ke siñghār se maiñ ne

isī sabab se kabhī be-hunar nahīñ huī maiñ

kisī ko kaise batātī maiñ manziloñ kā pata

jab apne saath sharīk-e-safar nahīñ huī maiñ

ḳhudā-e-husn-azal ne mujhe navāzā hai

ḳhumār-e-ishq se sarf-e-nazar nahīñ huī maiñ

hai us kā da.avā ki maiñ us kī zindagī huuñ 'nāz'

vo kyā karegā kisī din agar nahīñ huī maiñ

haris-e-KHwahish-e-lal-o-guhar nahin hui main

mohabbaton mein talabgar-e-zar nahin hui main

tera KHayal raha dil ki dhaDkanon ke qarin

so tere gham se kabhi be-KHabar nahin hui main

sajaya KHud ko wafa ke singhaar se main ne

isi sabab se kabhi be-hunar nahin hui main

kisi ko kaise batati main manzilon ka pata

jab apne sath sharik-e-safar nahin hui main

KHuda-e-husn-azal ne mujhe nawaza hai

KHumar-e-ishq se sarf-e-nazar nahin hui main

hai us ka dawa ki main us ki zindagi hun 'naz'

wo kya karega kisi din agar nahin hui main