haris-e-shab kabhi aasuda-e-sahar na hua

harīs-e-shab kabhī āsūda-e-sahar na huā

ye kārobār-e-havas hai jo muḳhtasar na huā

kisī se ho na sakā ḳhud-gazīdgī kā ilaaj

ye zahr vo hai ki tiryāk kā asar na huā

sabhoñ ko bhuul gayā kārobār-e-hastī meñ

maiñ apne aap se ik pal bhī be-ḳhabar na huā

jo aaj tak mire lams-e-qalam se hai mahrūm

vo harf harf to hai harf-e-mo'tabar na huā

ajiib baat hai patthar pe rah gayā mahfūz

vo naqsh-e-pā jo kabhī naqsh-e-rahguzar na huā

thakan se chuur the rukte to phir qayāmat thī

bhalā huā jo kahīñ sāya-e-shajar na huā

vo aadmī jo maqām-e-bashar samajh na sakā

tamām umr farishta rahā bashar na huā

ḳhudā-parastī nahīñ hai to ḳhud-parastī sahī

magar jabīñ ko mirī zauq-e-sañg-e-dar na huā

use ḳhayāl thā tashkīl-e-jāda-e-nau kā

kisī ke saath vo āmāda-e-safar na huā

haris-e-shab kabhi aasuda-e-sahar na hua

ye karobar-e-hawas hai jo muKHtasar na hua

kisi se ho na saka KHud-gazidgi ka ilaj

ye zahr wo hai ki tiryak ka asar na hua

sabhon ko bhul gaya karobar-e-hasti mein

main apne aap se ek pal bhi be-KHabar na hua

jo aaj tak mere lams-e-qalam se hai mahrum

wo harf harf to hai harf-e-mo'tabar na hua

ajib baat hai patthar pe rah gaya mahfuz

wo naqsh-e-pa jo kabhi naqsh-e-rahguzar na hua

thakan se chur the rukte to phir qayamat thi

bhala hua jo kahin saya-e-shajar na hua

wo aadmi jo maqam-e-bashar samajh na saka

tamam umr farishta raha bashar na hua

KHuda-parasti nahin hai to KHud-parasti sahi

magar jabin ko meri zauq-e-sang-e-dar na hua

use KHayal tha tashkil-e-jada-e-nau ka

kisi ke sath wo aamada-e-safar na hua