hasb-e-mamul aae hain shaKHon mein phul ab ke baras

hasb-e-ma.amūl aa.e haiñ shāḳhoñ meñ phuul ab ke baras

saya-afgan haiñ magar un par babūl ab ke baras

is tarah badlā mohabbat kā usuul ab ke baras

ham bhī haiñ maġhmūm tum bhī ho malūl ab ke baras

jhoñpaḌoñ se kaT ke chāñdī ke bagūle chal diye

baalā baalā uḌ ga.ī sone kī dhuul ab ke baras

itne ġham itne masā.il itne unvān-e-soḳhan

hai judā har sher kī shān-e-nuzūl ab ke baras

kaT ga.iiñ sadiyāñ isī mauhūm sī ummīd par

āsmāñ se hogā rahmat kā nuzūl ab ke baras

miT ga.ī tahrīr-e-qismat uTh ga.e anjum-shanās

aql ḳhud kartī hai tadbīr-e-husūl ab ke baras

inqilāb-āsār hai raftār māh-o-sāl kī

kuchh to badlegā zamāne kā usuul ab ke baras

hasb-e-mamul aae hain shaKHon mein phul ab ke baras

saya-afgan hain magar un par babul ab ke baras

is tarah badla mohabbat ka usul ab ke baras

hum bhi hain maghmum tum bhi ho malul ab ke baras

jhonpaDon se kaT ke chandi ke bagule chal diye

baala baala uD gai sone ki dhul ab ke baras

itne gham itne masail itne unwan-e-soKHan

hai juda har sher ki shan-e-nuzul ab ke baras

kaT gain sadiyan isi mauhum si ummid par

aasman se hoga rahmat ka nuzul ab ke baras

miT gai tahrir-e-qismat uTh gae anjum-shanas

aql KHud karti hai tadbir-e-husul ab ke baras

inqilab-asar hai raftar mah-o-sal ki

kuchh to badlega zamane ka usul ab ke baras