hasin aankhon mein palte hue se Dar dekhe

hasīn āñkhoñ meñ palte hue se Dar dekhe

ki ham ne jalte hue titliyoñ ke par dekhe

balā kī dhund thī kuchh bhī nazar na aatā thā

añdhere phailte ham ne nagar nagar dekhe

sadaf kī baat hai kyā vo guhar bhī pā.egā

utar ke gahre samundar meñ vo agar dekhe

vo aag kyā thī jo bhaḌkī thī kyoñ ḳhudā jaane

ki ham ne jalte hue bastiyoñ meñ ghar dekhe

na jāneñ dard hamārā na dekheñ zaḳhm-e-jigar

ajiib tarah ke kuchh ham ne chārāgar dekhe

kināre kashtī ko le jaa.e nāḳhudā kyūñkar

ki ham ne lahroñ meñ uThte hue bhañvar dekhe

vo ḳhvāb kitnā bhayānak thā chīḳh uTThā maiñ

lahū meñ haath jo apne hī tar-ba-tar dekhe

rah-e-hayāt meñ jo apnā saath chhoḌ ga.e

kuchh is tarah ke bhī ai 'raaj ham-safar dekhe

hasin aankhon mein palte hue se Dar dekhe

ki hum ne jalte hue titliyon ke par dekhe

bala ki dhund thi kuchh bhi nazar na aata tha

andhere phailte hum ne nagar nagar dekhe

sadaf ki baat hai kya wo guhar bhi paega

utar ke gahre samundar mein wo agar dekhe

wo aag kya thi jo bhaDki thi kyon KHuda jaane

ki hum ne jalte hue bastiyon mein ghar dekhe

na jaanen dard hamara na dekhen zaKHm-e-jigar

ajib tarah ke kuchh hum ne chaaragar dekhe

kinare kashti ko le jae naKHuda kyunkar

ki hum ne lahron mein uThte hue bhanwar dekhe

wo KHwab kitna bhayanak tha chiKH uTTha main

lahu mein hath jo apne hi tar-ba-tar dekhe

rah-e-hayat mein jo apna sath chhoD gae

kuchh is tarah ke bhi ai 'raj ham-safar dekhe