hasin-e-pir ki mahfil mein diwane nahin aate

hasīn-e-pīr kī mahfil meñ dīvāne nahīñ aate

jo sham.eñ bujh chukī haiñ un pe parvāne nahīñ aate

sar-e-mahfil kabhī chappal vo lahrāne nahīñ aate

raqīboñ ke saroñ par phuul barsāne nahīñ aate

bulandī ishq-e-kāmil aur pastī hai havasnākī

jahāñ andhe pahuñchte haiñ vahāñ kaane nahīñ aate

tumhārī harkatoñ kā shaiḳh jī duniyā meñ charchā hai

haqīqat jānte haiñ ham ko afsāne nahīñ aate

ilāhī maskan-e-būm-e-ḳhush-ilhāñ ab kahāñ hogā

nazar duniyā ke naqsha meñ bhī vīrāne nahīñ aate

muhāse aur chechak kī sajāvaT hai vo chehre par

ki vo ab muft bhī tasvīr khiñchvāne nahīñ aate

vo hāziq doctor bhī haiñ ba-yak-chashmī ke baa.is se

marīz us ko kabhī bhūle se dikhlāne nahīñ aate

hasin-e-pir ki mahfil mein diwane nahin aate

jo shamen bujh chuki hain un pe parwane nahin aate

sar-e-mahfil kabhi chappal wo lahrane nahin aate

raqibon ke saron par phul barsane nahin aate

bulandi ishq-e-kaamil aur pasti hai hawasnaki

jahan andhe pahunchte hain wahan kane nahin aate

tumhaari harkaton ka shaiKH ji duniya mein charcha hai

haqiqat jaante hain hum ko afsane nahin aate

ilahi maskan-e-bum-e-KHush-ilhan ab kahan hoga

nazar duniya ke naqsha mein bhi virane nahin aate

muhase aur chechak ki sajawaT hai wo chehre par

ki wo ab muft bhi taswir khinchwane nahin aate

wo haziq doctor bhi hain ba-yak-chashmi ke bais se

mariz us ko kabhi bhule se dikhlane nahin aate