hasin hai yak-o-duje ke intiKHab ka rang

hasīn hai yak-o-dūje ke intiḳhāb kā rang

mujhe pasand ho tum aur tumheñ gulāb kā rang

hudūd-e-zabt se aage nikal na jā.ūñ kahīñ

'ayāñ hai chāk-e-garebān se shabāb kā rang

'ajab nahīñ mire ahbāb hoñ mire qātil

ki surḳh surḳh dikhā.ī diyā hai aab kā rang

ḳhayāl aayā mujhe qahqahe lagāte hue

utar na jaa.e tabī'at se iztirāb kā rang

nigāheñ ātish-e-vahshat se jalne vaalī haiñ

jamā huā hai ḳhirad par guzishta ḳhvāb kā rang

zamāne girya-kunāñ hoñ mire masā.ib par

siyāh rakkhā gayā yuuñ mirī kitāb kā rang

shab-e-visāl mirī zaat par ye raaz khulā

chaḌhā thā mom ke paikar pe āftāb kā rang

udāsī ranj-o-alam dard-o-be-kasī aur ġham

kisī bhī rang meñ Dhal jā.egā 'azāb kā rang

janāb-e-qais kī dar-badriyoñ ne baḳhshā hai

hamāre 'ishq-o-mohabbat ko inqilāb kā rang

khaḌe haiñ hosh meñ rindān-e-mai-kada 'mehvar'

nashe meñ mast hai saaqī tirī sharāb kā rang

hasin hai yak-o-duje ke intiKHab ka rang

mujhe pasand ho tum aur tumhein gulab ka rang

hudud-e-zabt se aage nikal na jaun kahin

'ayan hai chaak-e-gareban se shabab ka rang

'ajab nahin mere ahbab hon mere qatil

ki surKH surKH dikhai diya hai aab ka rang

KHayal aaya mujhe qahqahe lagate hue

utar na jae tabi'at se iztirab ka rang

nigahen aatish-e-wahshat se jalne wali hain

jama hua hai KHirad par guzishta KHwab ka rang

zamane girya-kunan hon mere masaib par

siyah rakkha gaya yun meri kitab ka rang

shab-e-visal meri zat par ye raaz khula

chaDha tha mom ke paikar pe aaftab ka rang

udasi ranj-o-alam dard-o-be-kasi aur gham

kisi bhi rang mein Dhal jaega 'azab ka rang

janab-e-qais ki dar-badriyon ne baKHsha hai

hamare 'ishq-o-mohabbat ko inqilab ka rang

khaDe hain hosh mein rindan-e-mai-kada 'mehwar'

nashe mein mast hai saqi teri sharab ka rang