hasin itna laga hum pe muflisi ka libas

hasīn itnā lagā ham pe muflisī kā libās

ki phir banā hī liyā is ko zindagī kā libās

hamāre naap ke milte haiñ ġham ke pairāhan

hamāre naap kā miltā nahīñ ḳhushī kā libās

ye kitnā tang zamāne ne kar diyā is ko

chaḌhā.e chaḌhtā nahīñ tan pe āshiqī kā libās

ujāle din meñ banāte haiñ tīrgī kī qabā

añdhere raat ko silte haiñ raushnī kā libās

na zabt kī ga.ī hastī kī ham se pāmālī

utaar pheñk diyā ham ne naukrī kā libās

maiñ fāqa-mastoñ kī zīnat huuñ muflisoñ kā amiir

maiñ phaTne dūñgā nahīñ tan pe tishnagī kā libās

hasin itna laga hum pe muflisi ka libas

ki phir bana hi liya is ko zindagi ka libas

hamare nap ke milte hain gham ke pairahan

hamare nap ka milta nahin KHushi ka libas

ye kitna tang zamane ne kar diya is ko

chaDhae chaDhta nahin tan pe aashiqi ka libas

ujale din mein banate hain tirgi ki qaba

andhere raat ko silte hain raushni ka libas

na zabt ki gai hasti ki hum se pamali

utar phenk diya hum ne naukri ka libas

main faqa-maston ki zinat hun muflison ka amir

main phaTne dunga nahin tan pe tishnagi ka libas