hasin jabin pe mere honT thartharane lage

hasīñ jabīñ pe mire hoñT thartharāne lage

phir is ke baad mire hosh kab Thikāne lage

maiñ ret par bhī tarāshūñ jo ḳhāl-o-ḳhad us ke

sitāre parda kareñ chāñd muñh chhupāne lage

ye ābshār ye bādal ye jhiil kā paanī

use sañvarne ko sab aa.ina dikhāne lage

kabhī jo chheḌā kisī ne bhī tazkira un kā

shajar ḳhamīda hue phuul muskurāne lage

unhoñ ne pūchhā na us kī koī zarūrat thī

ham apnā haal dil-e-muztarib sunāne lage

mire laboñ ne faqat naam hī liyā us kā

parind us kī galī shahr tak batāne lage

maiñ us ke paas jo baiThūñ ulajh paḌe ḳhushbū

charāġh ghūre mujhe aur tilmilāne lage

vo duur āḳhirī kursī pe baiThe baiThe mujhe

dilāsā dene lage hausla baḌhāne lage

ye jaan kar ki tirā but paḌā hai mandir meñ

ḳhudā-parast vahāñ ghanTiyāñ bajāne lage

maiñ us ke shahr se aaya huuñ jaan kar itnā

tamām log mire rāste sajāne lage

jahāñ baserā kiyā panchhiyoñ ne tere liye

hameñ vo ghoñsle pairoñ ke āstāne lage

ye husn ek hī saa.at meñ ban gayā thā miyāñ

ḳhudā ko ishq banāne meñ kuchh zamāne lage

ḳhumār dekhā jo āñkhoñ meñ niiñd kā 'dānish'

zamīñ pe aa ke farishte use sulāne lage

hasin jabin pe mere honT thartharane lage

phir is ke baad mere hosh kab Thikane lage

main ret par bhi tarashun jo KHal-o-KHad us ke

sitare parda karen chand munh chhupane lage

ye aabshaar ye baadal ye jhil ka pani

use sanwarne ko sab aaina dikhane lage

kabhi jo chheDa kisi ne bhi tazkira un ka

shajar KHamida hue phul muskurane lage

unhon ne puchha na us ki koi zarurat thi

hum apna haal dil-e-muztarib sunane lage

mere labon ne faqat nam hi liya us ka

parind us ki gali shahr tak batane lage

main us ke pas jo baiThun ulajh paDe KHushbu

charagh ghure mujhe aur tilmilane lage

wo dur aaKHiri kursi pe baiThe baiThe mujhe

dilasa dene lage hausla baDhane lage

ye jaan kar ki tera but paDa hai mandir mein

KHuda-parast wahan ghanTiyan bajaane lage

main us ke shahr se aaya hun jaan kar itna

tamam log mere raste sajaane lage

jahan basera kiya panchhiyon ne tere liye

hamein wo ghonsle pairon ke aastane lage

ye husn ek hi saat mein ban gaya tha miyan

KHuda ko ishq banane mein kuchh zamane lage

KHumar dekha jo aankhon mein nind ka 'danish'

zamin pe aa ke farishte use sulane lage