hasin KHwab ke naqsh-o-nigar kyon TuTe

hasīn ḳhvāb ke naqsh-o-nigār kyoñ TuuTe

ḳhilāf-e-bā'is-e-tā'bīr the so yuuñ TuuTe

maiñ is liye bhī tire sehr meñ abhī tak huuñ

maiñ chāhtā hī nahīñ huuñ tirā fusūñ TuuTe

maiñ haar jā.ūñ magar jiit chhīn luuñ tujh se

ke is maqām pe aa kar mirā junūñ TuuTe

jahān-bhar meñ dikhā.ī de vāhima merā

gire jo ḳhvāb kabhī aañkh se to yuuñ TuuTe

shadīd shor-e-fuġhāñ chār-sū sunā.ī de

sukūt kā jo mire darmiyāñ sutūñ TuuTe

kabhī rakhā hī nahīñ dil ko haath par maiñ ne

kabhī girā hī nahīñ dil to phir ye kyoñ TuuTe

use shikast nahīñ zarf tū samajh us kā

vo tere sāmne ho kar jo sar-nigūñ TuuTe

hasin KHwab ke naqsh-o-nigar kyon TuTe

KHilaf-e-ba'is-e-ta'bir the so yun TuTe

main is liye bhi tere sehr mein abhi tak hun

main chahta hi nahin hun tera fusun TuTe

main haar jaun magar jit chhin lun tujh se

ke is maqam pe aa kar mera junun TuTe

jahan-bhar mein dikhai de wahima mera

gire jo KHwab kabhi aankh se to yun TuTe

shadid shor-e-fughan chaar-su sunai de

sukut ka jo mere darmiyan sutun TuTe

kabhi rakha hi nahin dil ko hath par main ne

kabhi gira hi nahin dil to phir ye kyon TuTe

use shikast nahin zarf tu samajh us ka

wo tere samne ho kar jo sar-nigun TuTe