hasin libas mein behad bhala lage hai mujhe

hasīñ libās meñ behad bhalā lage hai mujhe

vo aadmī hai magar devtā lage hai mujhe

kitāb-e-zīst ke aurāq muntashir kar ke

vo apnī zaat se kitnā kaTā lage hai mujhe

ye shorishoñ kā zamāna ye vaar kā mausam

zamīñ se tā-ba-falak chīḳhtā lage hai mujhe

na jaane kab se huuñ rāh-e-safar meñ sargardāñ

vujūd apnā kahīñ bhāgtā lage hai mujhe

galī galī meñ kuchh aisā sukūt chhāyā hai

ki apnī chīḳh bhī ab be-sadā lage hai mujhe

kahāñ se aa.e lahū ġham-zada patangoñ meñ

charāġh-e-shām bhī bujhtā huā lage hai mujhe

gharoñ meñ band raho khiḌkiyāñ bhī mat kholo

ki ab ye shahr bhī aaseb sā lage hai mujhe

maiñ reza-reza huā jā rahā huuñ ai 'parvez'

mirā vujūd bhī bikhrā huā lage hai mujhe

hasin libas mein behad bhala lage hai mujhe

wo aadmi hai magar dewta lage hai mujhe

kitab-e-zist ke auraq muntashir kar ke

wo apni zat se kitna kaTa lage hai mujhe

ye shorishon ka zamana ye war ka mausam

zamin se ta-ba-falak chiKHta lage hai mujhe

na jaane kab se hun rah-e-safar mein sargardan

wujud apna kahin bhagta lage hai mujhe

gali gali mein kuchh aisa sukut chhaya hai

ki apni chiKH bhi ab be-sada lage hai mujhe

kahan se aae lahu gham-zada patangon mein

charagh-e-sham bhi bujhta hua lage hai mujhe

gharon mein band raho khiDkiyan bhi mat kholo

ki ab ye shahr bhi aaseb sa lage hai mujhe

main reza-reza hua ja raha hun ai 'parwez'

mera wujud bhi bikhra hua lage hai mujhe