hasin nahin koi us shoKH dilruba ki tarah

hasīñ nahīñ koī us shoḳh dilrubā kī tarah

ki jis ke sāmne mahtāb hai suhā kī tarah

habāb-dār nahīñ e.atibār is tan kā

abhī ye ruuh nikal jā.egī havā kī tarah

husūl-e-kār-e-muhaqqiq nahīñ muqallid ko

asā meñ tāqat-e-raftār kab hai pā kī tarah

hayā-o-sharm se parda gayā zamāne kā

kabhī vo but na dikhā.ī diyā ḳhudā kī tarah

hayāt-e-tāza milegī marīz-e-hijrāñ ko

jo ek bosa ināyat karo davā kī tarah

husūd jo haiñ mire dost haiñ tire zālim

rafīq ho ga.e begāne āshnā kī tarah

harīs kī nahīñ duniyā meñ qadr kuchh 'bāqī'

kahāñ magas kī fazīlat huī humā kī tarah

hasin nahin koi us shoKH dilruba ki tarah

ki jis ke samne mahtab hai suha ki tarah

habab-dar nahin eatibar is tan ka

abhi ye ruh nikal jaegi hawa ki tarah

husul-e-kar-e-muhaqqiq nahin muqallid ko

asa mein taqat-e-raftar kab hai pa ki tarah

haya-o-sharm se parda gaya zamane ka

kabhi wo but na dikhai diya KHuda ki tarah

hayat-e-taza milegi mariz-e-hijran ko

jo ek bosa inayat karo dawa ki tarah

husud jo hain mere dost hain tere zalim

rafiq ho gae begane aashna ki tarah

haris ki nahin duniya mein qadr kuchh 'baqi'

kahan magas ki fazilat hui huma ki tarah