hasin raat ka manzar dikhai deta hai

hasīn raat kā manzar dikhā.ī detā hai

har ik charāġh suḳhanvar dikhā.ī detā hai

ye TimTimāte hue jugnuoñ kā ik halqa

ka.ī sitāroñ se behtar dikhā.ī detā hai

ye kis ke lams ne mad.hosh kar diyā us ko

surūr-yāfta sāġhar dikhā.ī detā hai

jahāñ se zarra barābar bhī kuchh nahīñ dikhtā

vahāñ se saaf tirā ghar dikhā.ī detā hai

usī ko der talak dekhne kī hasrat hai

vo ek chehra jo pal bhar dikhā.ī detā hai

hamārā ishq hai maqbūliyat kī manzil par

kisī ke haath meñ patthar dikhā.ī detā hai

ye kis maqām pe le aaya ulfatoñ kā junūn

shikasta dil bhī subuk-sar dikhā.ī detā hai

ik intizār meñ ġharqāb ho chukā 'hānī'

zamāne bhar ko shanāvar dikhā.ī detā hai

hasin raat ka manzar dikhai deta hai

har ek charagh suKHanwar dikhai deta hai

ye TimTimate hue jugnuon ka ek halqa

kai sitaron se behtar dikhai deta hai

ye kis ke lams ne madhosh kar diya us ko

surur-yafta saghar dikhai deta hai

jahan se zarra barabar bhi kuchh nahin dikhta

wahan se saf tera ghar dikhai deta hai

usi ko der talak dekhne ki hasrat hai

wo ek chehra jo pal bhar dikhai deta hai

hamara ishq hai maqbuliyat ki manzil par

kisi ke hath mein patthar dikhai deta hai

ye kis maqam pe le aaya ulfaton ka junun

shikasta dil bhi subuk-sar dikhai deta hai

ek intizar mein gharqab ho chuka 'hani'

zamane bhar ko shanawar dikhai deta hai