hasin raaton jamil taron ki yaad si rah gai hai baqi

hasīn rātoñ jamīl tāroñ kī yaad sī rah ga.ī hai baaqī

kuchh apnī ujḌī huī bahāroñ kī yaad sī rah ga.ī hai baaqī

har ek mahfil paḌī hai suunī tamām mele bichhaḌ chuke haiñ

sitamgaroñ kī sitam-shi.āroñ kī yaad sī rah ga.ī hai baaqī

ġham-e-vafā kahne sunñe vaale kahāñ ga.e ahl-e-dil na jaane

tumhārī ulfat ke rāz-dāroñ kī yaad sī rah ga.ī hai baaqī

vo shaam se aarzū sahar kī vo be-kalī raat raat bhar kī

un āshnā āshnā sitāroñ kī yaad sī rah ga.ī hai baaqī

udhar bhī ahd-e-vafā ke TukḌe khaTak ke pahlū meñ so chuke haiñ

yahāñ bhī TuuTe hue sahāroñ kī yaad sī rah ga.ī hai baaqī

gilā nahīñ 'saif' be-kasī kā kisī kā ġham kaun pūchhtā hai

yahī bahut hai ki ġham-gusāroñ kī yaad sī rah ga.ī hai baaqī

hasin raaton jamil taron ki yaad si rah gai hai baqi

kuchh apni ujDi hui bahaaron ki yaad si rah gai hai baqi

har ek mahfil paDi hai suni tamam mele bichhaD chuke hain

sitamgaron ki sitam-shiaron ki yaad si rah gai hai baqi

gham-e-wafa kahne sunne wale kahan gae ahl-e-dil na jaane

tumhaari ulfat ke raaz-daron ki yaad si rah gai hai baqi

wo sham se aarzu sahar ki wo be-kali raat raat bhar ki

un aashna aashna sitaron ki yaad si rah gai hai baqi

udhar bhi ahd-e-wafa ke TukDe khaTak ke pahlu mein so chuke hain

yahan bhi TuTe hue sahaaron ki yaad si rah gai hai baqi

gila nahin 'saif' be-kasi ka kisi ka gham kaun puchhta hai

yahi bahut hai ki gham-gusaron ki yaad si rah gai hai baqi