hasrat-e-ahd-e-wafa baqi hai

hasrat-e-ahd-e-vafā baaqī hai

terī āñkhoñ meñ hayā baaqī hai

baat meñ kohna rivāyāt kā lutf

haath par rañg-e-hinā baaqī hai

abhī hāsil nahīñ zālim ko davām

abhī duniyā meñ ḳhudā baaqī hai

bujh gayā gir ke ḳhunuk aab meñ chāñd

sat.h-e-dariyā pe sadā baaqī hai

gopiyāñ hī kisī gokul meñ nahīñ

bañsiyoñ meñ to navā baaqī hai

paañv ke nīche saraktī huī ḳhaak

sar meñ masnad kī havā baaqī hai

biich meñ raat, bachan, biite milan

oT meñ jaltā diyā baaqī hai

dekh ye chāñd nadī phuul na jā

rut meñ ras shab meñ nasha baaqī hai

hasrat-e-ahd-e-wafa baqi hai

teri aankhon mein haya baqi hai

baat mein kohna riwayat ka lutf

hath par rang-e-hina baqi hai

abhi hasil nahin zalim ko dawam

abhi duniya mein KHuda baqi hai

bujh gaya gir ke KHunuk aab mein chand

sath-e-dariya pe sada baqi hai

gopiyan hi kisi gokul mein nahin

bansiyon mein to nawa baqi hai

panw ke niche sarakti hui KHak

sar mein masnad ki hawa baqi hai

bich mein raat, bachan, bite milan

oT mein jalta diya baqi hai

dekh ye chand nadi phul na ja

rut mein ras shab mein nasha baqi hai