hasrat-e-jalwa-e-didar liye phirti hai

hasrat-e-jalva-e-dīdār liye phirtī hai

pesh-e-rozan pas-e-dīvār liye phirtī hai

is mashaqqat se use ḳhaak na hogā hāsil

jaan abas jism kī be-kār liye phirtī hai

dekhne detī nahīñ us ko mujhe be-hoshī

saath kyā apne ye dīvār liye phirtī hai

kisī fāsiq ke tū muñh ko na karegī kaalā

kyuuñ siyāhī ye shab-e-tār liye phirtī hai

tū nikaltā nahīñ shamshīr-ba-kaf ai qātil

maut mere liye talvār liye phirtī hai

māl-e-muflis mujhe samjhā hai junūñ ne shāyad

vahshat-e-dil sar-e-bāzār liye phirtī hai

ka.aba o dair meñ vo ḳhāna-barandāz kahāñ

gardish-e-kāfir-o-dīñ-dār liye phirtī hai

rañj likkhā hai nasīboñ meñ mire rāhat se

ḳhvāb meñ bhī havas-e-yār liye phirtī hai

chaal meñ is kī sarāpā hai kisī kī taqlīd

kabk ko yaar kī raftār liye phirtī hai

dar-e-yār aa.e Thikāne lage miTTī merī

dosh par apne sabā baar liye phirtī hai

hañste haiñ dekh ke majnūñ ko gul-e-sahrā.ī

pā-barahna talab-e-ḳhār liye phirtī hai

saaya sā husn ke ham-rāh hai ishq-e-bebāk

saath ye jins-e-ḳharīdār liye phirtī hai

kisī sūrat se nahīñ jaañ ko farār ai 'ātish'

tapish-e-dil mujhe lāchār liye phirtī hai

hasrat-e-jalwa-e-didar liye phirti hai

pesh-e-rozan pas-e-diwar liye phirti hai

is mashaqqat se use KHak na hoga hasil

jaan abas jism ki be-kar liye phirti hai

dekhne deti nahin us ko mujhe be-hoshi

sath kya apne ye diwar liye phirti hai

kisi fasiq ke tu munh ko na karegi kala

kyun siyahi ye shab-e-tar liye phirti hai

tu nikalta nahin shamshir-ba-kaf ai qatil

maut mere liye talwar liye phirti hai

mal-e-muflis mujhe samjha hai junun ne shayad

wahshat-e-dil sar-e-bazar liye phirti hai

kaba o dair mein wo KHana-barandaz kahan

gardish-e-kafir-o-din-dar liye phirti hai

ranj likkha hai nasibon mein mere rahat se

KHwab mein bhi hawas-e-yar liye phirti hai

chaal mein is ki sarapa hai kisi ki taqlid

kabk ko yar ki raftar liye phirti hai

dar-e-yar aae Thikane lage miTTi meri

dosh par apne saba bar liye phirti hai

hanste hain dekh ke majnun ko gul-e-sahrai

pa-barahna talab-e-KHar liye phirti hai

saya sa husn ke ham-rah hai ishq-e-bebak

sath ye jins-e-KHaridar liye phirti hai

kisi surat se nahin jaan ko farar ai 'atish'

tapish-e-dil mujhe lachaar liye phirti hai