hasrat-e-lazzat-e-didar liye phirti hai

hasrat-e-lazzat-e-dīdār liye phirtī hai

dar-ba-dar kūcha-o-bāzār liye phirtī hai

faḳhr se bād-e-sabā sahn-e-chaman meñ ai dost

kuchh tirī shoḳhī-e-raftār liye phirtī hai

jān-o-dil hosh-o-ḳhirad aur matā.a-e-īmāñ

kyā kuchh ik nargis-e-bīmār liye phirtī hai

bulbul-e-naġhma-sarā ko bhī mile baar ki vo

nazr ko shoḳhī-e-guftār liye phirtī hai

terī āvāz kī lai naqsh-e-kaf-e-pā kī kashish

qaid meñ naġhma o gulzār liye phirtī hai

ai jafā-kesh tirī kam-nigahī ke sadqe

kitne rusvā sar-e-bāzār liye phirtī hai

in dinoñ jū-e-chaman aks-e-hujūm-e-gul se

kuchh hadīs-e-lab-o-ruḳhsār liye phirtī hai

dosto ko tirī begāna-vashī ai zālim

kis qadar jaan se bezār liye phirtī hai

āj-kal un kī nigāheñ jo phirī haiñ 'naqvī'

har nazar haath meñ talvār liye phirtī hai

hasrat-e-lazzat-e-didar liye phirti hai

dar-ba-dar kucha-o-bazar liye phirti hai

faKHr se baad-e-saba sahn-e-chaman mein ai dost

kuchh teri shoKHi-e-raftar liye phirti hai

jaan-o-dil hosh-o-KHirad aur mataa-e-iman

kya kuchh ek nargis-e-bimar liye phirti hai

bulbul-e-naghma-sara ko bhi mile bar ki wo

nazr ko shoKHi-e-guftar liye phirti hai

teri aawaz ki lai naqsh-e-kaf-e-pa ki kashish

qaid mein naghma o gulzar liye phirti hai

ai jafa-kesh teri kam-nigahi ke sadqe

kitne ruswa sar-e-bazar liye phirti hai

in dinon ju-e-chaman aks-e-hujum-e-gul se

kuchh hadis-e-lab-o-ruKHsar liye phirti hai

dosto ko teri begana-washi ai zalim

kis qadar jaan se bezar liye phirti hai

aaj-kal un ki nigahen jo phiri hain 'naqwi'

har nazar hath mein talwar liye phirti hai