hasrat-e-shauq-e-shahadat hai nikal jaane do

hasrat-e-shauq-e-shahādat hai nikal jaane do

aaj ḳhanjar ko gale par mire chal jaane do

mast ho dīda-e-mai-gūñ se zamāna saarā

tum jo paimāne se aañkh apnī badal jaane do

dil bhī de deñge talabgār haiñ gar dil ke hasīn

pahle chuTkī se kaleja unheñ mal jaane do

roktā kaun hai jaatī hai to jaa.e shab-e-hijr

kaalā muñh karne do kam-baḳht ko Tal jaane do

yād-e-mizhgāñ hī se hāsil hai mujhe lutf-e-ḳhalish

tiir chalte haiñ kaleje pe to chal jaane do

aisā bhī kyā hai abhī aa.e ho jaanā Thero

aur do chaar ghaḌī dil ko bahal jaane do

tā.ir-e-rūh pe aafat qafas-e-jism meñ hai

chār-dīvār-e-‘anāsir se nikal jaane do

aafat aa.egī mohabbat ke gunahgāroñ par

khol kar dete ho kyoñ zulf meñ bal jaane do

maiñ ye kahtā huuñ ki aġhyār kā jaama na pahan

dil ko zid hai ki mujhe bhes badal jaane do

paañv rakhtā hai rah-e-shauq meñ ai hazrat-e-dil

sar ke bal jaatā huuñ maiñ āñkhoñ ke bal jaane do

chhoḌ do kūcha-e-jānāñ kā tasavvur 'raunaq'

dil jo kam-baḳht machaltā hai machal jaane do

hasrat-e-shauq-e-shahadat hai nikal jaane do

aaj KHanjar ko gale par mere chal jaane do

mast ho dida-e-mai-gun se zamana sara

tum jo paimane se aankh apni badal jaane do

dil bhi de denge talabgar hain gar dil ke hasin

pahle chuTki se kaleja unhen mal jaane do

rokta kaun hai jati hai to jae shab-e-hijr

kala munh karne do kam-baKHt ko Tal jaane do

yaad-e-mizhgan hi se hasil hai mujhe lutf-e-KHalish

tir chalte hain kaleje pe to chal jaane do

aisa bhi kya hai abhi aae ho jaana Thero

aur do chaar ghaDi dil ko bahal jaane do

tair-e-ruh pe aafat qafas-e-jism mein hai

chaar-diwar-e-‘anasir se nikal jaane do

aafat aaegi mohabbat ke gunahgaron par

khol kar dete ho kyon zulf mein bal jaane do

main ye kahta hun ki aghyar ka jama na pahan

dil ko zid hai ki mujhe bhes badal jaane do

panw rakhta hai rah-e-shauq mein ai hazrat-e-dil

sar ke bal jata hun main aankhon ke bal jaane do

chhoD do kucha-e-jaanan ka tasawwur 'raunaq'

dil jo kam-baKHt machalta hai machal jaane do