hasraten dabti hain un ke hi ishaare dekh kar

hasrateñ dabtī haiñ un ke hī ishāre dekh kar

ruḳh badal jaatā hai maujoñ kā kināre dekh kar

Dūbne vaale ko tinke kā sahārā hai bahut

shām-e-ġham raushan nazar aa.ī sitāre dekh kar

kyā kaheñ kis kis haqīqat kī vazāhat ho ga.ī

is nazar ke chand mub.ham se ishāre dekh kar

dil ne jo kuchh thā sipurd-e-soz-e-ulfat kar diyā

apnī jānib ātish-e-ġham ke sharāre dekh kar

un kī mahfil un ke jalve un ke altāf-o-karam

aur kyā dekheñgī āñkheñ ye nazāre dekh kar

ham jo kahte the ki duniyā meñ hameñ haiñ ġham nasīb

ro diye apne sivā kuchh ġham ke maare dekh kar

apnā ik TuuTā sahārā yaad aatā hai 'hazīñ'

muḳhtalif 'unvāñ se duniyā ke sahāre dekh kar

hasraten dabti hain un ke hi ishaare dekh kar

ruKH badal jata hai maujon ka kinare dekh kar

Dubne wale ko tinke ka sahaara hai bahut

sham-e-gham raushan nazar aai sitare dekh kar

kya kahen kis kis haqiqat ki wazahat ho gai

is nazar ke chand mubham se ishaare dekh kar

dil ne jo kuchh tha sipurd-e-soz-e-ulfat kar diya

apni jaanib aatish-e-gham ke sharare dekh kar

un ki mahfil un ke jalwe un ke altaf-o-karam

aur kya dekhengi aankhen ye nazare dekh kar

hum jo kahte the ki duniya mein hamein hain gham nasib

ro diye apne siwa kuchh gham ke mare dekh kar

apna ek TuTa sahaara yaad aata hai 'hazin'

muKHtalif 'unwan se duniya ke sahaare dekh kar