hasraten dil mein bahut lab pe shikayat kai

hasrateñ dil meñ bahut lab pe shikāyāt ka.ī

vaqt kī den haiñ qismat kī ināyāt ka.ī

tum chale aao to in sab ko haqīqat kar deñ

chāñdnī raat ne chheḌī haiñ hikāyāt ka.ī

haa.e vo naqsh ki tajdīd tarāshe jis ko

aur phir noch leñ farsūda rivāyāt ka.ī

dil ke aurāq khañgālo to mileñ bhī tum ko

harf-dar-harf samoī huī āyāt ka.ī

dosto haath na thāmo ki mire siine meñ

jhilmilāte haiñ abhī zaḳhm-e-hidāyāt ka.ī

jaane kis zaḳhm kī rangīn jhalak haiñ 'rāhī'

chand sheroñ meñ tire harf-o-hikāyāt ka.ī

hasraten dil mein bahut lab pe shikayat kai

waqt ki den hain qismat ki inayat kai

tum chale aao to in sab ko haqiqat kar den

chandni raat ne chheDi hain hikayat kai

hae wo naqsh ki tajdid tarashe jis ko

aur phir noch len farsuda riwayat kai

dil ke auraq khangalo to milen bhi tum ko

harf-dar-harf samoi hui aayat kai

dosto hath na thamo ki mere sine mein

jhilmilate hain abhi zaKHm-e-hidayat kai

jaane kis zaKHm ki rangin jhalak hain 'rahi'

chand sheron mein tere harf-o-hikayat kai