hasti-e-haq ke maani jo mera dil samjha

hastī-e-haq ke ma'ānī jo mirā dil samjhā

apnī hastī ko ik andesha-e-bātil samjhā

vo shanāvar huuñ jo har mauj ko sāhil samjhā

vo musāfir huuñ jo har gaam ko manzil samjhā

kāfirī sehr na thī 'ishq-e-butāñ khel na thā

ba-ḳhudā maiñ to isī se use mushkil samjhā

utrā dariyā meñ pa-e-ġhusl jo vo ġhairat-e-gul

shor-e-amvāj ko maiñ shor-e-anādil samjhā

kufr-o-islām kī tafrīq nahīñ fitrat meñ

ye vo nuqta hai jise maiñ bhī ba-mushkil samjhā

shaiḳh ne chashm-e-hiqārat se jo dekhā mujh ko

ba-ḳhudā maiñ use allāh se ġhāfil samjhā

na kiyā yaar ne 'akbar' ke junūñ ko taslīm

mil ga.ī aañkh to kuchh soch ke ‘āqil samjhā

hasti-e-haq ke ma'ani jo mera dil samjha

apni hasti ko ek andesha-e-baatil samjha

wo shanawar hun jo har mauj ko sahil samjha

wo musafir hun jo har gam ko manzil samjha

kafiri sehr na thi 'ishq-e-butan khel na tha

ba-KHuda main to isi se use mushkil samjha

utra dariya mein pa-e-ghusl jo wo ghairat-e-gul

shor-e-amwaj ko main shor-e-anadil samjha

kufr-o-islam ki tafriq nahin fitrat mein

ye wo nuqta hai jise main bhi ba-mushkil samjha

shaiKH ne chashm-e-hiqarat se jo dekha mujh ko

ba-KHuda main use allah se ghafil samjha

na kiya yar ne 'akbar' ke junun ko taslim

mil gai aankh to kuchh soch ke ‘aqil samjha