hasti ko apni ishq ke shayan banaiye

hastī ko apnī ishq ke shāyāñ banā.iye

un kī nazar-nazar ko rag-e-jāñ banā.iye

rūdād-e-dard-e-ishq se hairāñ banā.iye

un ko bhī aaj ashk-ba-dāmāñ banā.iye

darmāñ ko dard dard ko darmāñ banā.iye

sehr-e-nazar se ishq ko hairāñ banā.iye

mahrūm rah sake na koī siina ishq se

phūloñ ko hañs ke chāk-garebāñ banā.iye

jo kuchh matā-e-dil thī shab-e-ġham ne luuT lī

aañsū kahāñ ki zīnat-e-mizhgāñ banā.iye

ye mushkileñ hī asl meñ rāz-e-hayāt haiñ

dushvāriyoñ ko aap na āsāñ banā.iye

kaliyoñ ko ye latīf tabassum kahāñ nasīb

bas ab na chashm-e-shauq ko hairāñ banā.iye

kahtī haiñ pā-e-yār pe sajdoñ kī azmateñ

is kufr hī ko hāsil-e-īmāñ banā.iye

mahdūd-e-auj-e-charḳh na rakhiye kamāl-e-husn

zarroñ ko mehr-o-māh badāmāñ banā.iye

ḳhud ko jo pā gayā hai vo un ko bhī pā gayā

hastī ko apnī manzil-e-jānāñ banā.iye

'nayyar' ba-hadd-e-dasht gulistāñ banā to kyā

apnī nazar nazar ko gulistāñ banā.iye

hasti ko apni ishq ke shayan banaiye

un ki nazar-nazar ko rag-e-jaan banaiye

rudad-e-dard-e-ishq se hairan banaiye

un ko bhi aaj ashk-ba-daman banaiye

darman ko dard dard ko darman banaiye

sehr-e-nazar se ishq ko hairan banaiye

mahrum rah sake na koi sina ishq se

phulon ko hans ke chaak-gareban banaiye

jo kuchh mata-e-dil thi shab-e-gham ne luT li

aansu kahan ki zinat-e-mizhgan banaiye

ye mushkilen hi asl mein raaz-e-hayat hain

dushwariyon ko aap na aasan banaiye

kaliyon ko ye latif tabassum kahan nasib

bas ab na chashm-e-shauq ko hairan banaiye

kahti hain pa-e-yar pe sajdon ki azmaten

is kufr hi ko hasil-e-iman banaiye

mahdud-e-auj-e-charKH na rakhiye kamal-e-husn

zarron ko mehr-o-mah badaman banaiye

KHud ko jo pa gaya hai wo un ko bhi pa gaya

hasti ko apni manzil-e-jaanan banaiye

'nayyar' ba-hadd-e-dasht gulistan bana to kya

apni nazar nazar ko gulistan banaiye