hasti koi aisi bhi hai insan ke siwa aur

hastī koī aisī bhī hai insāñ ke sivā aur

maz.hab kā ḳhudā aur hai matlab kā ḳhudā aur

har jāda-e-manzil meñ hai sajde kī adā aur

ma.abad kī fazā aur hai maqtal kī fazā aur

phir Thahr gayā qāfila-e-dard sunā hai

shāyad koī raste meñ mirī tarah girā aur

ik jur.a-e-āḳhir kī kamī rah ga.ī āḳhir

jitnī vo pilāte ga.e āñkhoñ ne kahā aur

mimbar se bahut fasl hai maidān-e-amal kā

taqdīr ke mard aur haiñ mardān-e-viġhā aur

allāh gila kar ke maiñ pachhtāyā huuñ kyā kyā

jab ḳhatm huī baat kahīñ us ne kahā aur

kitne bhī hoñ kushte maraz-e-hirs-o-havā ke

bīmār kī maut aur hai marg-e-shohadā aur

kyā zer-e-lab ai dost hai iz.hār-e-jasārat

haq ho ki vo nāhaq ho zarā lai to baḌhā aur

ye vahm sā hotā hai mujhe dekh ke in ko

sīrat kā ḳhudā aur hai sūrat kā ḳhudā aur

daulat kā to pahle hī gunahgār thā mun.im

daulat kī mohabbat ne gunahgār kiyā aur

ye daur jo ai 'najm' hai urdu kā muḳhālif

is daur meñ urdu kī huī nashv-o-numā aur

hasti koi aisi bhi hai insan ke siwa aur

mazhab ka KHuda aur hai matlab ka KHuda aur

har jada-e-manzil mein hai sajde ki ada aur

mabad ki faza aur hai maqtal ki faza aur

phir Thahr gaya qafila-e-dard suna hai

shayad koi raste mein meri tarah gira aur

ek jura-e-aKHir ki kami rah gai aaKHir

jitni wo pilate gae aankhon ne kaha aur

mimbar se bahut fasl hai maidan-e-amal ka

taqdir ke mard aur hain mardan-e-wigha aur

allah gila kar ke main pachhtaya hun kya kya

jab KHatm hui baat kahin us ne kaha aur

kitne bhi hon kushte maraz-e-hirs-o-hawa ke

bimar ki maut aur hai marg-e-shohada aur

kya zer-e-lab ai dost hai izhaar-e-jasarat

haq ho ki wo nahaq ho zara lai to baDha aur

ye wahm sa hota hai mujhe dekh ke in ko

sirat ka KHuda aur hai surat ka KHuda aur

daulat ka to pahle hi gunahgar tha munim

daulat ki mohabbat ne gunahgar kiya aur

ye daur jo ai 'najm' hai urdu ka muKHalif

is daur mein urdu ki hui nashw-o-numa aur