haT-dharmi ki kahun ki main iman ki kahun

haT-dharmī kī kahūñ ki maiñ īmān kī kahūñ

apnā karūñ bayāñ ki tirī shaan kī kahūñ

dil meñ ye ab Thanī hai ki īmān kī kahūñ

kuchh kar ke muḳhtasar maiñ tirī shaan kī kahūñ

merī jo vo suneñ kabhī mauqa mujhe mile

sab dil kā haal kaifiyat armān kī kahūñ

pāband-e-dām-e-zulf hai āshufta dil mirā

kyā sarguzasht aise pareshān kī kahūñ

dīvāngī meñ bhī rahe zarb us ke naam kī

maiñ bad-havās ho ke bhī ausān kī kahūñ

kuchh diin kī sunā.ūñ ki duniyā kī dāstān

kuchh qudsiyoñ kī likhkhūñ ki insān kī kahūñ

maiñ dhyān meñ huuñ us ke vo hai rāz-dāñ mirā

kuchh mezbāñ kī likhkhūñ ki mehmān kī kahūñ

yaañ hai bharosa haq pe vahāñ aql par madār

hālat kahūñ gadā kī ki sultān kī kahūñ

haq kahne vāloñ ke liye hai daar kī sazā

ban jaa.e jaan par agar īmān kī kahūñ

maiñ huuñ kitāb-e-ma.arifat-e-haq kā dars-yāb

ab kyā kisī se ved kī qur.ān kī kahūñ

hai 'shād' pur-bahār ye josh-e-junūñ mirā

dāman kī ab kahūñ ki garebān kī kahūñ

haT-dharmi ki kahun ki main iman ki kahun

apna karun bayan ki teri shan ki kahun

dil mein ye ab Thani hai ki iman ki kahun

kuchh kar ke muKHtasar main teri shan ki kahun

meri jo wo sunen kabhi mauqa mujhe mile

sab dil ka haal kaifiyat arman ki kahun

paband-e-dam-e-zulf hai aashufta dil mera

kya sarguzasht aise pareshan ki kahun

diwangi mein bhi rahe zarb us ke nam ki

main bad-hawas ho ke bhi ausan ki kahun

kuchh din ki sunaun ki duniya ki dastan

kuchh qudsiyon ki likhkhun ki insan ki kahun

main dhyan mein hun us ke wo hai raaz-dan mera

kuchh mezban ki likhkhun ki mehman ki kahun

yan hai bharosa haq pe wahan aql par madar

haalat kahun gada ki ki sultan ki kahun

haq kahne walon ke liye hai dar ki saza

ban jae jaan par agar iman ki kahun

main hun kitab-e-marifat-e-haq ka dars-yab

ab kya kisi se wed ki quran ki kahun

hai 'shad' pur-bahaar ye josh-e-junun mera

daman ki ab kahun ki gareban ki kahun