haT ke us rah se jo hai waqf bas inkar ke nam

haT ke us rah se jo hai vaqf bas inkār ke naam

aao phir sher kaheñ gesū-e-dildār ke naam

zahr-e-ġham le to chalā jaañ ko magar tishna-labī

jur.a ik aur tamannā-e-lab-e-yār ke naam

rasm-e-ushshāq hai ye is ko nibhā.eñ ham bhī

varaq-e-jāñ ko likheñ sho.ala-e-ruḳhsār ke naam

vo kare qatl to andesha-e-dushnām nahīñ

har rag-e-jāñ ko kareñ dashna-o-talvār ke naam

shahr-e-pābandī-e-ādāb lagā hukm koī

chāk-dāman hai mirā raunaq-e-bāzār ke naam

chob be-barg sahī daftar-e-shah meñ lekin

phuul khilte hī raheñge sabad-e-dār ke naam

ḳhvāb-zāroñ pe rahe dhuup ke manzar paiham

koī sūraj na jalā qarya-e-bedār ke naam

ham ne 'jamshed' likhe umr ke saare mausam

us ke hoñToñ pe bhaTakte hue iqrār ke naam

haT ke us rah se jo hai waqf bas inkar ke nam

aao phir sher kahen gesu-e-dildar ke nam

zahr-e-gham le to chala jaan ko magar tishna-labi

jura ek aur tamanna-e-lab-e-yar ke nam

rasm-e-ushshaq hai ye is ko nibhaen hum bhi

waraq-e-jaan ko likhen shoala-e-ruKHsar ke nam

wo kare qatl to andesha-e-dushnam nahin

har rag-e-jaan ko karen dashna-o-talwar ke nam

shahr-e-pabandi-e-adab laga hukm koi

chaak-daman hai mera raunaq-e-bazar ke nam

chob be-barg sahi daftar-e-shah mein lekin

phul khilte hi rahenge sabad-e-dar ke nam

KHwab-zaron pe rahe dhup ke manzar paiham

koi suraj na jala qarya-e-bedar ke nam

hum ne 'jamshed' likhe umr ke sare mausam

us ke honTon pe bhaTakte hue iqrar ke nam