hatheliyon mein chand ko nihaarne ki dhun mein hun

hatheliyoñ meñ chāñd ko nihārne kī dhun meñ huuñ

zamīñ pe ek āsmāñ utārne kī dhun meñ huuñ

sunā hai koī bhī amal gayā kabhī na rā.egāñ

maiñ dushmanoñ ko dostī se mārne kī dhun meñ huuñ

paḌā huā huuñ is liye maiñ sāhiloñ kī god meñ

lahar ke saath zindagī guzārne kī dhun meñ huuñ

mujhe muaaf mat karo sazā kā mustahiq huuñ maiñ

muqaddaroñ ko aap ke sañvārne kī dhun meñ huuñ

ka.ī gharoñ ko joḌ kar banā.ī thiiñ jo bastiyāñ

unhī gharoñ meñ raushnī utārne kī dhun meñ huuñ

kahāñ najāt mil sakī fareb ke hisār se

maiñ aa.ine meñ aks ko utārne kī dhun meñ huuñ

zavāl se nikāl kar kamāl kī taraf 'asar'

dabī huī hayāt ko ubhārne kī dhun meñ huuñ

hatheliyon mein chand ko nihaarne ki dhun mein hun

zamin pe ek aasman utarne ki dhun mein hun

suna hai koi bhi amal gaya kabhi na raegan

main dushmanon ko dosti se marne ki dhun mein hun

paDa hua hun is liye main sahilon ki god mein

lahar ke sath zindagi guzarne ki dhun mein hun

mujhe muaf mat karo saza ka mustahiq hun main

muqaddaron ko aap ke sanwarne ki dhun mein hun

kai gharon ko joD kar banai thin jo bastiyan

unhi gharon mein raushni utarne ki dhun mein hun

kahan najat mil saki fareb ke hisar se

main aaine mein aks ko utarne ki dhun mein hun

zawal se nikal kar kamal ki taraf 'asar'

dabi hui hayat ko ubhaarne ki dhun mein hun