haTi zulf un ke chehre se magar aahista aahista

haTī zulf un ke chehre se magar āhista āhista

ayaañ sūraj huā vaqt-e-sahar āhista āhista

chaTak kar dī sadā ġhunche ne shāḳh-e-gul kī jumbish par

ye gulshan hai zarā bād-e-sahar āhista āhista

qafas meñ dekh kar baazū asiir aapas meñ kahte haiñ

bahār-e-gul tak aa jā.eñge par āhista āhista

koī chhup jā.egā bīmār-e-shām-e-hijr kā marnā

pahuñch jā.egī un tak bhī ḳhabar āhista āhista

ġham-e-tabdīlī-e-gulshan kahāñ tak phir ye gulshan hai

qafas bhī ho to ban jaatā hai ghar āhista āhista

hamāre bāġhbāñ ne kah diyā gulchīñ ke shikve par

na.e ashjār bhī deñge samar āhista āhista

ilāhī kaun sā vaqt aa gayā bīmār-e-furqat par

ki uTh kar chal diye sab chāra-gar āhista āhista

na jaane kyuuñ na aayā varna ab tak kab kā aa jaatā

agar chaltā vahāñ se nāma-bar āhista āhista

ḳhafā bhī haiñ irāda bhī hai shāyad baat karne kā

vo chal nikle haiñ mujh ko dekh kar āhista āhista

javānī aa ga.ī dil chhedne kī baḌh ga.iiñ mashqeñ

chalānā aa gayā tīr-e-nazar āhista āhista

jise ab dekh kar ik jaan paḌtī hai mohabbat meñ

yahī ban jā.egī qātil nazar āhista āhista

abhī tak yaad hai kal kī shab-e-ġham aur tanhā.ī

phir is par chāñd kā Dhalnā 'qamar' āhista āhista

haTi zulf un ke chehre se magar aahista aahista

ayan suraj hua waqt-e-sahar aahista aahista

chaTak kar di sada ghunche ne shaKH-e-gul ki jumbish par

ye gulshan hai zara baad-e-sahar aahista aahista

qafas mein dekh kar bazu asir aapas mein kahte hain

bahaar-e-gul tak aa jaenge par aahista aahista

koi chhup jaega bimar-e-sham-e-hijr ka marna

pahunch jaegi un tak bhi KHabar aahista aahista

gham-e-tabdili-e-gulshan kahan tak phir ye gulshan hai

qafas bhi ho to ban jata hai ghar aahista aahista

hamare baghban ne kah diya gulchin ke shikwe par

nae ashjar bhi denge samar aahista aahista

ilahi kaun sa waqt aa gaya bimar-e-furqat par

ki uTh kar chal diye sab chaara-gar aahista aahista

na jaane kyun na aaya warna ab tak kab ka aa jata

agar chalta wahan se nama-bar aahista aahista

KHafa bhi hain irada bhi hai shayad baat karne ka

wo chal nikle hain mujh ko dekh kar aahista aahista

jawani aa gai dil chhedne ki baDh gain mashqen

chalana aa gaya tir-e-nazar aahista aahista

jise ab dekh kar ek jaan paDti hai mohabbat mein

yahi ban jaegi qatil nazar aahista aahista

abhi tak yaad hai kal ki shab-e-gham aur tanhai

phir is par chand ka Dhalna 'qamar' aahista aahista