hausla tu ne diya dukh ki pazirai ka

hausla tū ne diyā dukh kī pazīrā.ī kā

mujh ko andāza na thā zaḳhm kī gahrā.ī kā

ḳhushbueñ phuul se ab izn safar māñgtī haiñ

is qadar qaht paḌā shahr meñ goyā.ī kā

ab nigāhoñ meñ na manzar hai na pas-manzar hai

ek ilzām in āñkhoñ pe hai bīnā.ī kā

sar-e-dahlīz pareshān-o-sarāsīma huuñ

dar muqaffal huā mujh par mirī tanhā.ī kā

silsile TuuT chuke saare mohabbat ke magar

sur se ik rabt hai qaa.em abhī shahnā.ī kā

is qadar jhuuT rachā hai rag-o-pai meñ 'mohsin'

chehra ab masḳh nazar aatā hai sachchā.ī kā

hausla tu ne diya dukh ki pazirai ka

mujh ko andaza na tha zaKHm ki gahrai ka

KHushbuen phul se ab izn safar mangti hain

is qadar qaht paDa shahr mein goyai ka

ab nigahon mein na manzar hai na pas-manzar hai

ek ilzam in aankhon pe hai binai ka

sar-e-dahliz pareshan-o-sarasima hun

dar muqaffal hua mujh par meri tanhai ka

silsile TuT chuke sare mohabbat ke magar

sur se ek rabt hai qaem abhi shahnai ka

is qadar jhuT racha hai rag-o-pai mein 'mohsin'

chehra ab masKH nazar aata hai sachchai ka