hausle aur siwa ho gae parwanon ke

hausle aur sivā ho ga.e parvānoñ ke

sho.ale armān baḌhā dete haiñ dīvānoñ ke

yahī aalam hai agar laġhzish-e-mastāna kā

Dher lag jā.eñge TuuTe hue paimānoñ ke

taur badlā na agar ahl-e-chaman ne apnā

nazar ā.eñge manāzir yahīñ vīrānoñ ke

āh-e-mazlūm agar dil se nikal jā.egī

ḳhaak par Dher nazar ā.eñge aivānoñ ke

qissa-e-sarmad-o-mansūr na chheḌ ai hamdam

varna jazbāt bhaḌak uTheñge dīvānoñ ke

aap mahfil meñ na aate to bahut achchhā thā

aaj to hosh uḌe jaate haiñ farzānoñ ke

daur-e-hāzir kī kashākash kā ye aalam hai ki bas

hausle past hue jaate haiñ insānoñ ke

kyā bigāḌegī bhalā shorish-e-tūfāñ us kā

jis ne ruḳh moḌ diye bārhā tūfānoñ ke

dosto bāteñ banāte ho sar-e-sāhil kyā

aao ruḳh moḌ ke dekheñ zarā tūfānoñ ke

us se ummīd-e-karam kyā kare koī 'kashfī'

kaam aatā ho jo apnoñ ke na begānoñ ke

hausle aur siwa ho gae parwanon ke

shoale arman baDha dete hain diwanon ke

yahi aalam hai agar laghzish-e-mastana ka

Dher lag jaenge TuTe hue paimanon ke

taur badla na agar ahl-e-chaman ne apna

nazar aaenge manazir yahin viranon ke

aah-e-mazlum agar dil se nikal jaegi

KHak par Dher nazar aaenge aiwanon ke

qissa-e-sarmad-o-mansur na chheD ai hamdam

warna jazbaat bhaDak uThenge diwanon ke

aap mahfil mein na aate to bahut achchha tha

aaj to hosh uDe jate hain farzanon ke

daur-e-hazir ki kashakash ka ye aalam hai ki bas

hausle past hue jate hain insanon ke

kya bigaDegi bhala shorish-e-tufan us ka

jis ne ruKH moD diye barha tufanon ke

dosto baaten banate ho sar-e-sahil kya

aao ruKH moD ke dekhen zara tufanon ke

us se ummid-e-karam kya kare koi 'kashfi'

kaam aata ho jo apnon ke na beganon ke