hawa bahut tez chal rahi hai charagh-e-jaan phir bhi jal raha hai

havā bahut tez chal rahī hai charāġh-e-jāñ phir bhī jal rahā hai

ye kaun hai jo hamāre pīchhe havā ke hamrāh chal rahā hai

gumāñ kī bastī meñ rahne vaalo zarā pahāḌī pe chaḌh ke dekho

udhar nadī hai vahīñ se shahr-e-yaqīñ kā rasta nikal rahā hai

sarāb-andar-sarāb tum ho charāġh-andar-charāġh ham haiñ

hamīñ se tārīkiyāñ haiñ ḳhā.if hamīñ se ḳhurshed jal rahā hai

hamāre bachche yahāñ raheñge to āñdhiyoñ meñ ghire raheñge

unheñ yahāñ se nikalnā hogā yahāñ kā manzar badal rahā hai

purānī qabroñ pe aaj kitne na.e makānoñ kī zindagī hai

jo aaj hai bas usī ko dekho vo bhuul jaao jo kal rahā hai

kisī ne shāne pe haath rakh kar jo naam pūchhā 'matīn' apnā

charāġh āñkhoñ meñ jal-bujhe haiñ vajūd saarā pighal rahā hai

hawa bahut tez chal rahi hai charagh-e-jaan phir bhi jal raha hai

ye kaun hai jo hamare pichhe hawa ke hamrah chal raha hai

guman ki basti mein rahne walo zara pahaDi pe chaDh ke dekho

udhar nadi hai wahin se shahr-e-yaqin ka rasta nikal raha hai

sarab-andar-sarab tum ho charagh-andar-charagh hum hain

hamin se tarikiyan hain KHaif hamin se KHurshed jal raha hai

hamare bachche yahan rahenge to aandhiyon mein ghire rahenge

unhen yahan se nikalna hoga yahan ka manzar badal raha hai

purani qabron pe aaj kitne nae makanon ki zindagi hai

jo aaj hai bas usi ko dekho wo bhul jao jo kal raha hai

kisi ne shane pe hath rakh kar jo nam puchha 'matin' apna

charagh aankhon mein jal-bujhe hain wajud sara pighal raha hai